زحمة دنيا

بسم الله الرحمن الرحيم

زحمة دنيا

زحمة دنيا كيف الفكة
كيف الراحة يالمريود
زحام في شنو وليه شنو
ما عرفنالو طريق
اشتهيت اللمة وعصيدةً حارة وقولت
" مرحب حبابك أخوي الصدّيق "
اشتهيت يمّا هبّابك في الراكوبة
ونسة وضحكة من جوّة
من جوة تبرّد حشا المحروق
لمّا في عصرية كل خالاتي
وأبوي وجيراني
أنسى فيها بكرة بالتحديد
أعيش ليومي جنبك سعيد
وبكرة برحمة كريم يوماً جديد
بقت أيامي جدول مواعيد
في الـ24 ساعة
10 ساعات تزيد
وأنوم غمران وأقوم مفزوع
عايش بفشفاش وااااااحد
وقت أتنفس
الحمد لله ماسكاه ضلوع
حالة الاكتئاب كترت لمن بقت عادي
والشوق بقى جنون فتناه بي غادي
لا عرفناه النوا وفراق الحيشان والمقيل
ولحظة دعاش وصباح النيل
ولا فوت السمحة الساكنة الفؤاد
أم طرفاً كحيل
أريتنا سمعنا نصيحة الرجعوا صدوا قبيل
مرضاً كتر كسّار الرجال
الكتوفا كانت ما بتميل
بقينا يمّا صورة منسوخة
من إنساناً كان
فقد ذاتو في لهث الدنيا
وفراق أهلاً حُنان
عايش ذكريات في قلبه
بيها مريض عيّان
في شقة فوق في سطوح
باباً دوام بحزن مفتوح
باباً ضيوفو صفير الريح
ووسادةً محشية هموم
غسيلا دموع
حليل زمن البكى للرجال ممنوع
سهرت مع .........!
وكيف حالكم متين الرجوع
وزي ما قلت ليك انوم غمران أقوم مخلوع
وأن د قدري حمداً للكريم
نصبر ليهو نطيع
شوقي ليكم يمّا
زي فطيم رضيع
يمّا الغربة بقّتني زولاً تاني
ما هو وليدك الساسر يب الأولاني
وما تقولي جبان وشكّاي
والرجالة خاتياني
د الغربة الشينة
بقّت السوداني ما زولك البتعرفيهو سوداني
مرض الهجرة خلى الهندي مصري
والكوري يماني
وناساً كتاااااااار بجوازاً
أمريكاني وكندي وبرطاني


بقلم / والدتي الحنونة .. وصديقتي الصدوقة .. وماستي المصونة ... أ. حنان باشري