رجيم اخر زمن

كان يا ما كان في قديم الزمان...كان فيه زوجين
حنفي....وفوزيه
وفي يوم من اليومين دول....وبينما حنفي يجلس هادئا مشاهدا للمسلسل اليومي
دخلت عليه فوزيه...وهى شايله الصنيه...وحدث الآتي


فوزيه: حنفي....حنفي
حنفي :أيوه يا فوزيه
فوزيه: بتشوف إيه؟
حنفي: التمثيليه يا حياتي اللي إنت بتحبيها
فوزيه: يا سلاام....ومن امتى؟ اشمعنى المسلسل ده متابعه قوى..واللا يعني علشان لهلوبه اللعوبه بتمثل فيه
حنفي: وآدى المسلسل يا ستي ...هه.....آدى الجزيره
فوزيه: آه....أصلك معجب بالمذيعه دي...ما أنا فاهماك كويس
حنفي: وآدي الجزيره....هه....نشوف أسامه السيد. ..طبخ وفن
فوزيه: ليه...هو أكلي ما بيعجبش واللا ايه
حنفي: أفففف...أنا داخل أنام
فوزيه: طبعا...مش عاوز تقعد معاي...وأنا شقيانه طول النهار


ودخل شهر زاد...قصدي حنفي ينام...وانفردت فوزيه بالتليفزيون...وأطبقت بقبضتها على التليفون...ودق جرس الهاتف بدلال عند سنيه...والتي جرت وتركت الكنافه على الطبليه...وجاء صوتها الرنان...والذي يبعث بالأمان


سنيه:ألووووووووو
فوزيه: أيوه يا سنسن...الحقيني يا اختى
سنيه: خير يا فوفو....قلقتيني
فوزيه: حنفي...حنفي يا سنيه....مش مهتم بيه...وطول الليل يبحلق في الممثلات. ..والمذيعات
سنيه: معلش يا ختي...ما تزعليش نفسك...بس الصراحه عنده حق
فوزيه: إيه....بتقولى إيه
سنيه: ما تزعليش ...انت عارفاني...أنا صريحه واللي في قلبي على لساني
فوزيه: أيوه...ما أنا عارفه لسانك...كملي
سنيه:أصلك تخنتي قوي...وبقيتي كبشه ...وإنت شايفه بنات اليومين دول عاملين إيه في نفسهم...ولازم يا ختي تخسي...وتبقي من صناع الحياه. ...وكمان تساعدي جوزك المحروس حنفي انه يغض بصره لما يلاقيك حلوه...ونقرب من ربنا...واللا الحجاب والعبايه اللي احنا لابسينهم دول مالهمش لازمه يا فوزيه
فوزيه: والله عندك حق...طب أعمل إيه....مش قادره أعمل ريجيم
سنيه: أنا حا أساعدك..وأروح معاك صالة الجيم اللي على ناصية الحاره...وأهو نشجع بعض
فوزيه: ماشى....يا رب أخس يا رب


ومر ت الليله...وفي الصباح وبعد أن انتهت فوزيه من المطبخ والتقليه...اتجهت لصديقتها سنيه...وانطلقا فورا للصاله اللولبيه


سنيه: شفت يا فوزيه...كام واحده تخينه...مش إنت لوحدك..نطي ياختي نطي


فوزيه: أيوه يا سنيه...شوفي دي...مكعبره..واللا دي...واللا دي.هب..هب.


سنيه: شفت دي لابسه بنطلون حلو قوي...يا ترى منين؟
فوزيه: لا...للللللا....بصي وشوفي اللي بتنط قدامك...والحلق اللي بينط في ودنها....واللا الغوايش...نطي ياختي نطي


سنيه: آه يا دماغي...جالي صداع...مش قادره


فوزيه: لا...لازم نكون أقوى من كده....زى الطويله اللي هناك دى...شفت ياختي رايحه جايه أزاي...تلاقي عندها خدامه...ولا بيتهد حيلها في الغسيل ولا حاجه
سنيه: بأقول لك إيه...تيجى نتعرف بيهم...وأهو نعرف بيخيطوا عباياتهم فين
فوزيه: فكره والله


ومرت الأيام....وفوزيه مستمره...وسنيه أيضا مستمره...والحال كما هو عليه
وفي ليلة أخرى من تلك الليالي المستخبيه


فوزيه: حنفي....حنفنف
حنفي: أيوه يا أم سحلب
فوزيه: قلت لك ميت مره ما تقوليش كده
حنفي: الله....مش ابنك
فوزيه: ما انت اللي اخترت اسمه. ....قولى يا فيفي
حنفي :حاضر يا فيفي...خير؟
فوزيه: إيه رأيك...مش خسيت؟
حنفي: هو فين ده....ده انت بقالك شهر رايحه جايه وبتصرفي أد كده...ولسه برده البضاعه كاملة الدسم
فوزيه: كده...سديت نفسي....الله يسامحك...أصلك مش بتشجعنى
حنفي: لا...لالالا يا حياتي...ده أنا نفسي تخسي...وتحت أمرك
فوزيه: طب ايدك على خومسوميت جنيه
حنفي: ليه...
فوزيه: حا أشترى ترينينج...وشوز رياضى...وشراب فوشيا...واستريتش بمبى...وتيشيرت أخضر...وتوكه لون الشورااااااب...وسكر للريجيم...ومربى للريجيم...ودايت بيبسي...وأيس كريم دايت...وعشره كيلو تفاح...وخمسه كيلو جريب فرووووووت..وعبايتين جداد من محلات ((المتحجبه التيفه))أروح بيهم ياخويا...أصلك ما شفتش الستات لابسين إيه


وانتهت الليله....وتشاجر حنفي وفوزي..بسبب الميزانيه...
وأكيد انتصرت فوزيه...

وبعد عشر سنوات
أن أن أاااااا

فوزيه: حنفي...أنا نازله عندي تمرين..لزوم الريجيم. .عاوز حاجه
حنفي: ريجيم...قال ريجيم قال
فوزيه: بتقول ايه
حنفي: لا يا حياتي...مع ألف سلامه
سحلب:بابا....مش كفايه بقى. ...بقى لك ساعه بتتفرج على الأغنيه دي ...وحولتني من القناة دي لدى وراها وراها


حنفي: سحلب...وبعدين....أمال نعمل إيه لحد ما ماما ترجع؟؟
وأنت عارف ما فيش فلوس عشان نخرج. ..ماما اللي ماسكه الميزانيه
سحلب: يوووووووووه....الجزيره تاني
حنفي: بأشوف النشره يا ولد